Sörur

Frá: Dagný
Ofnhiti: 180 °C

Hráefni

Botnar

3 eggjahvítur
3½ dl flórsykur
200 g möndlumjöl

Krem

1½ dl sykur
1½ dl vatn
5 eggjarauður
300 g smjör, mjúkt
40 g kakó (Upphaflega 3–4 msk., breytt í 40 g.)
1 tsk. vanillusykur
50 g núggat (má sleppa) (Höfundur setti tvö spurningarmerki við núggatið.)
2–3 tsk. skyndikaffiduft

Hjúpur

gott súkkulaði (t.d. suðusúkkulaði)
smá rjómi

Aðferð

Botnar

Þeytið eggjahvíturnar vel og bætið svo flórsykrinum út í.
Blandið möndlumjölinu varlega saman við.
Setjið deigið með teskeið á plötu klædda bökunarpappír, kökur á stærð við 100 kr. pening, því þær stækka talsvert. Mest 5×6 kökur á plötu.
Bakið við 180°C í 11–12 mínútur.
Látið kökurnar kólna aðeins á plötunni, en ekki alveg, áður en þær eru teknar af.

Krem

Sjóðið sykur og vatn saman í 8–10 mínútur þar til úr verður síróp.
Þeytið eggjarauðurnar vel og hellið sírópinu í mjórri bunu út í þær á meðan þeytt er. Þeytið vel.
Þeytið síðan mjúka smjörið vel út í, ásamt kakói, vanillusykri, núggati (ef notað) og kaffidufti. Þeytið allt vel.
Smakkið til.
Setjið kremið með skeið á sléttu hliðina á kökunum og kælið.
Hjúpið kremhliðina með góðu bræddu súkkulaði með smá rjóma.

Athugasemdir

Ef gera á tvöfalda uppskrift er ekki gott að gera báðar í einu.
Við titilinn stendur „(210)“, líklega fjöldi kakna.

Eins og hún skrifaði það

Sörur (210)

(Dagný)

3 eggjahv. - 3 1/2 dl. flórsykur 200 gr. möndlumjöl.

þeyta vel hvítur svo flórsykur út í bl. möndlumj. varl saman við ca. 100kr stækka talsvert. (ef gera á 2 uppskr. ekki gott að gera báðar í einu) 5x6 hám. á plötuna, láta aðeins kólna. ekki alveg. 180°C í 11-12 mín.

Krem: 1 1/2 dl. sykur + … 1 1/2 dl. vatn sjóða saman í 8-10 mín. í síróp þeyta vel 5 eggjarauður og hella sírópi í mjórri bunu út í rauðurnar þeyta vel síðan er 300 gr. mjúkt smjör þeytt vel út í og ~~3-4~~ 40 gr + 1 tsk. Vansyk msk. kakó + nougat?? 50 gr. nougat og 2-3 tsk. Kaffiduft. allt þeytt vel Smakka til. Kremið sett á kökurnar með skeið og kalt. Hjúpað með góðu súkkul. m/smá Rjóma